” عشت ادارى ”
بقلم ✍ فوزى سعيد
عشت أدارى ، وأدارى ، وأدارى
وفات كم عمر وانا ولا دارى
وغصب عنى دا طبع غلبنى
عكس ما كل الناس تفهمنى
تكون أحوالى
وعكس ما كل الناس تسمعنى
يكون موالى
#فاكر اول مرة دارتها
كانت لعبة حصان من طين
كنت صانعها قدام بيتنا
وحاطط على ضهرها جناحين
#وفاكر اول دمعه داريتها
ازاى خبيتها
علشان دمعى ميفضحنيش
واول مرة الموت فيها قرب
وانا مستغرب إنى هعيش
وفاكر اول كلمة دارتها
كانت كلمة فى مهد صبايا
ماتت الكلمة ولسه آثارها
عايشه لأخر عمرى معايا
وعشت ادارى الحزن ببسمه
ونظرة عين نهايتها سراب
وعشت ادارى البسمه برسمه
خطوط متشابكه جوا كتاب
وعشت ادارى سكونى بصوتى
وعشت ادارى الصوت بسكون
وياما داريت فى الغربة آلامى
وانا بضحك وفى قلبى شجون
وياما داريت عن نفسى حاجات
حاولت كتير مسألش عليها
وياما داريت احداث وساعات
كنت اتمنى اعيش حواليها
وياما داريت العمر بشمعة
اول مايو مايجى ع الباب
فتبكى الشمعه وقلبى يغنى
مهما يفوت من عمرى شباب
وياما داريت وداريت وداريت
